Jetzt vur kurz’n bin i aufg’hoit’n wurn,
von an Kibara mit obstehende Uhrn.
I hätt‘ eam in da Nocht, i muaß gestehn,
wenn a net a rots Lampal hätt‘, ibasehg’n.

Er winkt mi rechts zuwe mit seina Haund,
i soi g’fölligst fohrn zum Gehsteigraund.
Ihre Papiere, sogt a in an harschn Ton,
bei dera Planquadratsaktion.

Und wira di Papiere kontrolliert,
is a zum erschtn Moi frustiert.
Des G’sicht im „Deckl“ san net si,
si schaun aus d’rauf, so aundaswie.

I erklär eam, mei „Schein“ is scho oit,
damois, do woar i a no vü jinga hoit.
Er: soichane „Deckln“ gibt’s nimmameha,
si kumman mit an, aus da Kaisazeit dahea.

Er: Woher kumman si eigentlich mit’n in da Nocht,
frogt mi dea Blaukappla in seina Beamtntrocht.
I: Herr Inschpekta, i kumm von an Ball,
erklär i eam in an Wortschwall.

Wos haums trunk’n auf’n Fest?,
bevur i si festsetz‘, im Arrest.
I: trunk’n hob i fünf Obi-G’mixte,
Er: aha, oiso fünf G’spritzte!

Mei Mödung hot eam auf di Palme brocht,
d’rum hot a des „Blosröhrl“ in Stöllung brocht.
Er: Blosn’s eine, danoch werma sehgn,
ob’s daunn doch vielleicht ins Häfn gehn.

I blos und blos und di Null‘ wird net mea,
Er: si wern sehgn i ziag si ausn Vakeha,
vielleicht stengans a unta Drogneinfluss,
I: tuans weita, weu i scho Lulu muass.

Er: des is vadächtig,
dea Test is berechtigt,
des mit’n Lulu is a oita Schmäh‘
si kennan afoch nimma grod geh‘.

Irgendwi kummans ma doch bekaunt vur,
si haum a Ähnlichkeit mit an Häfnbruada mit ernara Statur.
Mochs amoi ihrn großn Koffaraum auf,
womeglich haums Diebespakl zuhauf.

Jetzt kennan’s ma di Worheit sogn,
bevur’s ihna geht aunan Krog’n.
I: I kumm von an Polizei-Event
und bin erna Polizeipräsident.

Vur lauta Schreck hot a salutiert
und sei G’sicht woar wi weiss grundiert.
I: Ob dera Nocht hob i hoch und heilig g’schwurn,
i werd nimma liagn bei an, mit obstehende Uhrn.