Zwoar san Messastecha spärlich,
oba wennst an triffst wirds g’fährlich
und damit i mi net firchtn muaß,
b’suach i jetzt an Karate-Kurs.

A Japana hot den Spurt erfunden,
„wach“ und „hoat san di Trainastundn,
des sogt unsa Lehra und dea wirds wissn
und in da söbn Sekundn hot er mi auf d’Mattn g’schmissn.

Hot’s weh‘ tau, frogt a mi noch dera „Kür“,
während i meine Knochn z’saummsortier.
Beim Aufsteh‘ hot a mi hoit’n miassn,
bei erm weri meine Sindn o’biaßn.

Jetzt was i wos in mir steckt,
in dem Spurt wer i net perfekt.
Der Japs sogt jetzt zu mir:
du bist jo stork wi a Stier.

Do mant a sichalich mei G’wicht,
nach diesem kurz’n Rohbericht.
Daunn erklärt a ma, wie’s weitageht,
ohne Schlog-, Stoß- und Wurfgerät.

I denk ma, i werd’s a moi probiern,
werd die „Kaumpfkunst“ studiern.
A Zubon und a Uwagi des is wichtig,
des weisse G’wandl, des is pflichtig.
Des G’wandl hot kane Knepf mehr,
mei Hosn rutsch und des is unfair.
Do gibt’s an Girtl, sogt da Japs zu mia,
der hoit z’saumm dei komplette Panier.

Heit werd i dir a Söbstvateidigung erklärn,
danoch muaß si da Messamau zwaungsernährn.
Wennst net aufpasst, bist boid a Gulasch
und wennst a Pech host, is er a Lulatsch.

Oiso denk drau, du muaßt eam übalistn,
daunn springt a freiwüllig in di Kistn.
Tua so, als ob’st wirklich Karate kaunst,
damit du erm späta a kräftige pflaunzt.

Jetzt schau ma zua, wi i des moch,
daunn schaut der aunders aus danoch.
Schnö muaßt sei, sonst bist „Meier“
und wennst net aufpasst, sans weg die …

Die Orm- und Banatechnik is wichtig,
di Schlog- und Stoßtechnik vüschichtig.
Du zeigst eam die Faust, do rennt a meistens eh
und mit da Haundkantn mochst aus erm a Püree.

Da Japs sogt: I zeig da des no amoi vur
und er zeigt mas in Zeitlupn in seina Montur.
Nix leichta ois des, denk i ma insgeheim,
mochs und rutsch aus, mit’n Staundbein.

Da Lehra: Sichst jetzt war’s fatal fir di,
es gangat „schnapp“ vom Messaraudi.
Weg war dei Birn saumtn Hois,
a dei Hirn saumt’n Schmoiz.

I sog: des woar a Pech, i vasuchs no amoi,
i setz‘ ma jetzt mei eiganes Denkmoi.
Da Japs: denkta i bin jetzt da Messamau,
pass auf deine Fiaß auf und sei schlau.

Pletzlich hot er a Plastikmessa in da Haund,
i: der wird schau’n, der ist mei Test-Probaund.
I hol aus und wü eam auf di Gurgl hau’n,
hob eig’setzt mei gaunzes Söbstvatraun…

…und im gleichn Moment duckt si der vife Japana
und i sich zum erschten Moi a Fata Morgana.
Luftspieglung mit Sehstörung nennt si des,
fir d’Augn, fir d’Nosn und sogor fir’s Gesäß.

Von weitn her i jetzt den Japaner sogn:
zerscht denkn und daunn erst schlogn.
Hinta eam woar leider a Mauer
und zu kurz woar mei „Flugdauer“.

AKH: di Brüch‘ woarn sehr kompliziert,
d’rum haums bei mir a laung opariert.
Ein Arzt: bitte tan’s kan Spurt mehr betreibn,
sunst san no hin ihre Baundscheibn.

Das Ende dieser Leidensgeschichte,
ich kaufte mir einen Pfefferspray gegen Bösewichte.