Kürzlich bin i durch di Stodt flaniert,
und hob an Wirschtlstaund auvisiert,
an Gusta hob i g’hobt auf Haße,
Burenheitl sogt ma zu dera Wurschtmasse.

Mit Kre, Senf und an Scherzl Brot,
des is fir mi des erschte Gebot.

Wi i so steh beim Wirschtlstaund,
frogt mi a Mau aus Deitschlaund:
Gibt es hier auch ’ne Pinkelwurst ?
i verdattert: Manan si a Dinklwurscht ?

I man i tram, der is net dicht in da Birn,
den haums „einepinklt“ in sei Hirn,
der kummt ma net gaunz ostrein vur,
do reisst ma glei mei Huatschnur.

I: se kennan di Burenheitl’n ess’n,
des is ana da feinstn Delikatessn,
oda a Eitrige mit Kas,
di is ka Lerchalschass,
dazua an Senf siaß oda schoaf,
des deckt eanan Togesbedoaf.
Vielleicht no an Pfeffaroni dazua,
do haums im Mog’n daunn ihr Ruah.

Da Deitsche: Da werd ich Wiener Würstel speisen,
I: di haßn Fraunkfurta, muaß i eam hinweisn,
schmeck’n dans a bessa wi bei eich,
hot ma festg’stöt bei an Vagleich
und dazua trinks no an steirischn Bock,
danoch glaubns, si san da Buddnbrock.

Oda si nehman ihna an Lebakas vom „Gigerer“,
mit an Schorfn und an Gurkerl, des is a prima.
Da Deitsche: „Gigerer“ was soll das denn sein ?
das gibt es nicht bei uns in Schleswig-Holstein.

Und weu da Deitsche no imma net was,
soll a Wirschtln essn, oda Lebakas,
so denk i ma, der is ma sympatisch,
mit sein Wortgeschwafl gaunz hanseatisch,
b’stö fia eam a Sömme mit an Lebakäse,
dem nettn Herrn aus Blankenese,
no schnö dazua zwa 16er Blech
und übanimm sei gaunze Zech.

So erklär i eam wos „Gigerer“ bedeit,
do gibt’s 2 Meglichkeitn öst’rreichweit,
zu einem is des arme Pferderl g’mant,
zum aundan wird der Fleischa so benannt.

Wia ma so stengan und gemeinsaum trinkn,
frog i, du dei Pinklwurscht, di muaß doch stinkn,
oda verwechsl i di Wurscht mit an feinan „Pinkl“ ?,
oda kummt die übahaupt von an aundan Winkl ?

Daunn wird ma richtig erklärt,
die „Pinklwurst“ die ist begehrt.
Sie ist eine geräucherte körnige Grützwurst,
dabei wird no mehr aug’regt mei Wissnsdurst.
I: a siaße Wurscht mit ana rotn Grütze,
bevur i di iss, moch i liaba 100 Liegestütze.

Mei Freind aus Hamburg erklärt mir dann,
das ich’s auch versteh‘ aus Nichtfachmann.
Aus grobgemahlenen besteht diese Grütze,
die Getreidekörner machen diese Würze,
geräuchert und mit Grünkohl gegessen,
bleibt die Wurst dir unvergessen.

So hat jede Wurst ihre Kultur
unbedacht gegessen, ihre Fettzufuhr.

Das Fazit von dieser G’schicht,
verurteile andere Würscht’l nicht,
denn jeder hat ’ne andere Esskultur,
das liegt halt so in unserer Natur.
Auch im Leberkäs ist das nicht drin‘,
was einem zu erst kommt in den Sinn.